فمان الجرح .. لا والله فمان احزانـي الكُبـرى
فمان اغلى ثلاث سنين مِتّ بْها عشان اعيـش
فمان الحب واحلام القلوب البيـض والخضـرا
فمان الآه من كثر الزعل والشـوق والتطنيـش
فمان عيونك اللي مالها بين العيون .. اُخـرى
فمان غرورك اللي علّم الطاووس نفْش الريـش
فمان عطورك اللي تسكن انفاسـي وبالأحـرى
فمان انفاسك اللي تسكن عطوري ومدري ليش؟
فمان الليل واحضـان الدفـا ومصافـح القمـرا
فمان الباب والشبّاك يوم اواعـدك .. ونطيـش
فمان التوت والرمـان واحلـى فاكهـه حمـرا
فمان الضحكه اللي كنّها من مبسمك .. بخشيش
فمان غيابك اللي ما ترك لمْواصلك .. بُشـرى
فمان الشك وظنون الخطأ والكـذب والتشويـش
فمان العيد .. كنّي به يجينـي وحالتـي تـزرى
يطبْطبْ فوق أكتافي حزن ويقولَ لِـي "معْليـش"
فمان الجوع واحساس العطش ومفارقك صحـرا
تعبت افتّش ْلواحاتهـا .. واضنانـي التفتيـش
فمان ضلوع مكتوب ٍعلـى أنحاءهـا اليُسـرى
"هُنا توجد جروحي" لو تكرّمتـي: بـلا تنبيـش
فمان دموع لا تُسمن ولا تُغنـي مـن الذكـرى
وانا اللي ماقدرت اطلع من اجوائي معك بشويش
فمان الشارع اللي كلّمـا جيتـه .. وانـا أقـرا
معاناتي من اوّل يوم في وصلك إلى التهميـش
فمان الشاعر اللي يجمـع بتجربْتـه الصغـرى
فكر بدْر .. ورومانسيّة نزار .. وفلسفة درويش
فمان العاشق المجني عليـه .. بتسليـة عـذرا
من اوّل "بعشقك" حتى نهاية "مـا تصبّرنيـش"
فمان الخوف ويدينك جنـود وأضلعـي أسـرى
وانا فيني من الإحباط ما يكفي هزيمـة جيـش
فمان اشياء مـا تنقـال للعالـم .. ولا تطـرى
ممالك حب .. دمّرها اللعب وسْياسة التطفيـش
فمان الإيش؟ مـا أدري ولكـنّ الزمـان ادرى
وانا اللي ضاع ما يدري حبيبه ضيّعه لجل ايش؟
فمان الله ياقلبي مـع انّـك جـرح مـا يبـرى
كتب ربّي عليّ اعيش من دونك (وانا ما اعيش)
